Yoga Vasistha — Utpatti Prakarana (Creation), Sarga 114, Verses 13–16

आब्रह्म स्तम्बपर्यन्तं तृणादि यदिदं जगत् । तत्सर्वं सर्वदात्मैव नाविद्या विद्यतेऽनघ ॥ १३ ॥ सर्वं च खल्विदं ब्रह्म नित्यं चिद्धनमक्षतम् । कल्पनान्या मनोनाम्नी विद्यते नहि काचन ॥ १४ ॥ न जायते न म्रियते किंचिदत्र जगत्त्रये । न च भावविकाराणां सत्ता क्वचन विद्यते ॥ १५ ॥ केवलं केवलाभासं सर्वसामान्यमक्षतम् । चेत्यानुपातरहितं चिन्मात्रमिह विद्यते ॥ १६ ॥