Yoga Vasistha — Upashama Prakarana (Dissolution), Sarga 36, Verses 40–43

भावानां भूरिभङ्गानामभवाय भवाय च । भव भावविमुक्तात्मा भावाभावबहिष्कृतः ॥ ४० ॥ जहि मानं महाकोपं कालुष्यं क्रूरतां तथा । न महान्तो निमज्जन्ति प्राकृते गुणसंकटे ॥ ४१ ॥ प्राक्तनीं दीर्घदौरात्म्यदशां स्मृत्वा पुनःपुनः । कोहं किं तद्बभूवेति हसन्मुक्ताच्छटासितम् ॥ ४२ ॥ ते प्रयाताः समारम्भा गतास्ते दग्धवासराः । येषु चिन्तानलज्वालाजालाकीर्णो भवानभूत् ॥ ४३ ॥