Yoga Vasistha — Upashama Prakarana (Dissolution), Sarga 51, Verses 29–34

कदोपशान्तचित्तात्मा चित्तामुपगतः पराम् । परमालोकमेष्यामि जात्यन्धविगमादिव ॥ २९ ॥ कदाभ्यासोपलभ्येन चित्प्रकाशेन चारुणा । दूरादालोकयिष्यामि तन्वीं कालकलामिमाम् ॥ ३० ॥ ईहितानीहितैर्मुक्तो हेयोपादेयवर्जितः । कदान्तस्तोषमेष्यामि स्वप्रकाशपदे स्थितः ॥ ३१ ॥ कदाशाकौशिकीकीर्णा जाड्यजीर्णहृदम्बुजा । क्षयमेष्यति कृष्णेयं कदा मे दोषयामिनी ॥ ३२ ॥ कदोपशान्तमननो धरणीधरकन्दरे । समेष्यामि शिलासाम्यं निर्विकल्पसमाधिना ॥ ३३ ॥ कदा मे मानमातङ्गः स्वाभिमानमहामदः । सत्त्वावबोधहरिणा हतो नाशमुपैष्यति ॥ ३४ ॥