Yoga Vasistha — Nirvana Prakarana Purva (Liberation, Part 1), Sarga 107, Verses 27–32

सर्वत्रैव हि तुष्यामि सर्वत्रैव रमे प्रभो । अवाञ्छनत्वान्मनसः सर्वत्रानन्दवानहम् ॥ २७ ॥ नियतं किंचिदेकत्र स्थितं स्वर्गकमीदृशम् । शक्र गन्तुं न जानामि त्वदाज्ञां न करोम्यहम् ॥ २८ ॥ शक्र उवाच । साधो विदितवेद्यानां परिपूर्णधियां समम् । सज्जनाचरितं युक्तं मन्ये भोगोपसेवनम् ॥ २९ ॥ देवेशे प्रोक्तवत्येवं तूष्णीमेव स्थिते नृपे । किमितो नापयाम्येष त्वमिति प्रोक्तवान् हरिः ॥ ३० ॥ नाहमद्यैव कालेन वदतीति शिखिध्वजे । कल्याणं तेऽस्तु कुम्भेति वदन्नन्तर्धिमाययौ ॥ ३१ ॥ तद्देववृन्दमखिलं त्रिदशेशयुक्तं तत्र क्षणादलमदृश्यमभूद्द्वितीयम् । कल्लोलराशिरिव वारिनिधौ प्रशान्ते वाते स्फुरन्मकरफेनफणीन्द्रवृन्दम् ॥ ३२ ॥