Yoga Vasistha — Nirvana Prakarana Purva (Liberation, Part 1), Sarga 113, Verses 9–12

कूपकुण्डचतुःशालकुम्भादीन्देहकानसौ । कृत्वा रक्षित आत्मेति याति तद्व्योम्नि भावनम् ॥ ९ ॥ अहंकारस्य तस्यास्य नामानीमानि राघव । श्रृणु यैर्जगदाकारविभ्रमैर्मोहयत्यसौ ॥ १० ॥ जीवो बुद्धिर्मनश्चित्तं माया प्रकृतिरित्यपि । संकल्पः कलना कालः कला चेत्यपि विश्रुतैः ॥ ११ ॥ एवमाद्यैस्तथान्यैश्च नामभिर्बहुतां गतैः । सहस्ररूपोऽहंकारः कल्पितार्थैर्विजृम्भते ॥ १२ ॥