Yoga Vasistha — Utpatti Prakarana (Creation), Sarga 2, Verses 2–8

अस्ति ह्याकाशजो नाम द्विजः परमधार्मिकः । ध्यानैकनिष्ठः सततं प्रजानां च हिते रतः ॥ २ ॥ स चिरं जीवति यदा तदा मृत्युरचिन्तयत् । सर्वाण्येव क्रमेणाह भूतान्यद्मि किलाक्षयः ॥ ३ ॥ एनमाकाशजं विप्रं न कस्माद्भक्षयाम्यहम् । अत्र मे कुण्ठिता शक्तिः खङ्गधारा इवोपले ॥ ४ ॥ इति संचिन्त्य तं हन्तुमगच्छत्तत्पुरं तदा । त्यजन्त्युद्यममुद्युक्ता न स्वकर्माणि केचन ॥ ५ ॥ ततस्तत्सदनं यावन्मृत्युः प्रविशति स्वयम् । तावदेनं दहत्यग्निः कल्पान्तज्वलनोपमः ॥ ६ ॥ अग्निज्वालामहामालां विदार्यान्तर्गतो ह्यसौ । द्विजं दृष्ट्वा समादातुं हस्तेनैच्छत्प्रयत्नतः ॥ ७ ॥ नचाशकत्पुरो दृष्टमपि हस्तशतैर्द्विजम् । बलवानप्यवष्टब्धुं संकल्पपुरुषं यथा ॥ ८ ॥