Yoga Vasistha — Utpatti Prakarana (Creation), Sarga 20, Verses 36–48

चित्ताकाशघनैकत्वात्स्वेऽप्यन्येऽपि भवन्ति ते । एवं नामोदितेऽप्यस्य चित्ते संसारखण्डके ॥ ३६ ॥ न किंचिदप्यभ्युदितं स्थितं व्योमैव निर्मलम् । स्वप्ने द्रष्टरि यद्वच्चित्तद्वद्दृश्ये चिदेव सा ॥ ३७ ॥ सर्वगैकतया यस्मात्सा स्वप्ने दृष्टदर्शना । यथा स्वप्ने तथोदेति परलोकदृगादिभिः ॥ ३८ ॥ परलोके यथोदेति तथैवेहाभ्युदेति सा । तत्स्वप्नपरलोकेह लोकानामसतां सताम् ॥ ३९ ॥ न मनागपि भेदोऽस्ति वीचीनामिव वारिणि । अतो जातमिदं विश्वमजातत्वादनाशि च ॥ ४० ॥ स्वरूपत्वात्तु नास्त्येव यच्च भाति चिदेव सा । यथैव चेत्यनिर्हीणा परमव्योमरूपिणी ॥ ४१ ॥ सचेत्यापि तथैवैषा परमव्योमरूपिणी । तस्माच्चेत्यमतो नान्यद्वीचित्वादीव वारितः ॥ ४२ ॥ वीचित्वं च रसे नास्ति शशशृङ्गवदेव हि । सैव चेत्यमिवापन्ना स्वभावादच्युताप्यलम् ॥ ४३ ॥ तस्मान्नास्त्येव दृश्योऽर्थः कुतोऽतो द्रष्टृदृश्यधीः । निमिषेणैव जीवस्य मृतिमोहादनन्तरम् ॥ ४४ ॥ त्रिजगद्दृश्यसर्गश्रीः प्रतिभामुपगच्छति । यथादेशं यथाकालं यथारम्भं यथाक्रमम् ॥ ४५ ॥ यथोत्पादं यथामातृ यथापितृ यथौरसम् । यथावयो यथासंविद्यथास्थानं यथेहितम् ॥ ४६ ॥ यथाबन्धु यथाभृत्यं यथेहास्तमयोदयम् । अजात एव जातोऽहमिति चेतति चिद्वपुः ॥ ४७ ॥ देशकालक्रियाद्रव्यमनोबुद्धीन्द्रियादि च । झटित्येव मृतेरन्ते वपुः पश्यति यौवने ॥ ४८ ॥