Yoga Vasistha — Upashama Prakarana (Dissolution), Sarga 14, Verses 32–36

प्राण्यङ्गेष्वपि जायन्ते विचित्राः ककुभं प्रति । स्थावरेष्वपि जायन्ते घुणा जघनकादयः ॥ ३२ ॥ शिलान्तरेषु जायन्ते कीटभेकघुणादयः । विष्ठायामपि जायन्ते नानाकीटगणास्तथा ॥ ३३ ॥ एवमेतेष्वसंख्येषु जन्मस्वपचयेषु च । अजस्रं करुणावन्तो नन्दन्तु प्ररुदन्तु वा ॥ ३४ ॥ अनारतमृतावस्मिन्ननारतसमुद्भवे । संसारसंभ्रमे युक्ता न तुष्टिर्न च दुःखिता ॥ ३५ ॥ पङ्क्तयस्त्वेवमेवेमा वृक्षपर्णगणैः समाः । उत्पत्योत्पत्य लीयन्ते भूतानां भूरिसंभवाः ॥ ३६ ॥