Yoga Vasistha — Upashama Prakarana (Dissolution), Sarga 34, Verses 105–110

संकल्पकलनेनैव ये केचन जना इमे । पतिता मोहजालेषु विनेत्रा इव पक्षिणः ॥ १०५ ॥ संकल्पजालवलितैर्विषयावटपातिभिः । पदवी गतबाधेयं न दृष्टा मत्पितामहैः ॥ १०६ ॥ दिनैः कतिपयैरेव स्फुरिता धरणीतले । वराकास्तेन ते नष्टा मशकाः कुहरेष्विव ॥ १०७ ॥ यद्यज्ञास्यन्निमे तत्त्वं भोगदुःखार्थिनस्तदा । भावाभावान्धकूपेषु नापतिष्यन्हताशयाः ॥ १०८ ॥ इच्छाद्वेषसमुत्थेन द्वन्द्वमोहेन जन्तवः । धराविवरमग्नानां कीटानां समतां गताः ॥ १०९ ॥ ईहितानीहिताकाराः कलनामृगतृष्णिकाः । सत्यावबोधमेधेन यस्य शान्ताः स जीवति ॥ ११० ॥