Yoga Vasistha — Upashama Prakarana (Dissolution), Sarga 35, Verses 33–36

केन संबध्यते व्योम केन संबाध्यते मनः । शरीरे शतधा याते खण्डना का शरीरिणः ॥ ३३ ॥ कुम्भे भग्ने क्षते क्षीणे कुम्भाकाशस्य का क्षतिः । पिशाचक इवादृश्यो मनो नामोदितं मुधा ॥ ३४ ॥ जडे तस्मिन्क्षते बोधात्का नः क्षतिरुपस्थिता । सुखदुःखमयी यस्य वासना तन्मनो मम ॥ ३५ ॥ अभवत्पूर्वमद्यैका संपन्नाऽतनुनिर्वृतिः । अन्यो भुङ्क्तेऽन्य आदत्तेऽप्यन्यस्यानर्थसंकटः ॥ ३६ ॥