Yoga Vasistha — Nirvana Prakarana Uttara (Liberation, Part 2), Sarga 154, Verses 1–6

मुनिरुवाच । इति निर्णीय दृश्येऽस्मिन्स्थितोऽस्मि विगतज्वरः । वीतरागो निराशङ्को निर्वाणो निरहंकृतिः ॥ १ ॥ निराधारो निराधेयो निर्मानो निरुपाश्रयः । स्वभावस्थः स्वयं शान्तः सर्गात्मा सर्वथोदितः ॥ २ ॥ यथाप्राप्तस्य कर्तास्मि न कर्तास्मि कदाचन । स्वयमेव हि यो व्योम कर्तृता तस्य कीदृशी ॥ ३ ॥ द्यौः क्षमा वायुराकाशं पर्वताः सरितो दिशः । इत्येकात्म नभः सर्वं भूतजालैकचिद्वपुः ॥ ४ ॥ शाम्यामि परिनिर्वामि सुखमासे च केवलम् । न विधिप्रतिषेधौ मे न मे बाह्यं न मेऽन्तरम् ॥ ५ ॥ इति मे तिष्ठत इह यथासंस्थानसंस्थितेः । अद्यायं त्वमनुप्राप्तः काकतालीयवत्पुरः ॥ ६ ॥