Yoga Vasistha — Nirvana Prakarana Uttara (Liberation, Part 2), Sarga 207, Verses 34–38

शुधराद्रियमाद्याढ्यं खमेव परलोकिनः । अभूतपूर्वमाभाति भूतपूर्ववदाततम् ॥ ३४ ॥ मृतोऽयं पुनरुत्पन्नो यमलोके शुभाशुभम् । भुञ्जेऽहमित्यतिघनं मृतो भ्रान्तिं प्रपश्यति ॥ ३५ ॥ मोक्षोपायानादरिणामेष मोहो न शाम्यति । बोधादवासनत्वेन मोह एष प्रशाम्यति ॥ ३६ ॥ अप्रबुद्धस्य या संवित्सा धर्माधर्मवासना । ख एव खात्मिका भाति यत्तदेव जगत्स्थितम् ॥ ३७ ॥ न शून्यरूपं न च सत्स्वरूपं ब्रह्माभिधं भाति जगत्स्वरूपम् । तच्चापरिज्ञानवशादनर्थभूतं परिज्ञातवतः शिवात्म ॥ ३८ ॥