Yoga Vasistha — Upashama Prakarana (Dissolution), Sarga 20, Verses 31–36

एवं स्थिते जगज्जाता बान्धवाः शतशो गताः । पितरो मातरश्चैव भ्रातरः सुहृदस्तथा ॥ ३१ ॥ कांस्तान्समनुशोचावो न शोचावश्च कानपि । बन्धूनिहातिशोचाव ईदृश्येव जगद्गतिः ॥ ३२ ॥ अनन्ताः पितरो यान्ति यान्त्यनन्ताश्च मातरः । इह संसारिणां पुंसां वनपादपपर्णवत् ॥ ३३ ॥ किं प्रमाणमतः पुत्र दुःखस्यात्र सुखस्य च । तस्मात्सर्वं परित्यज्य तिष्ठावः स्वच्छतां गतौ ॥ ३४ ॥ प्रपञ्चभावनां त्यक्त्वा मनस्यहमिति स्थिताम् । तां गतिं गच्छ भद्रं ते यां यान्ति गतिकोविदाः ॥ ३५ ॥ इहाजवं जवीभावं पतनोत्पतनात्मकम् । न च शोचन्ति सुधियश्चिरं वल्गन्ति केवलम् ॥ ३६ ॥