Yoga Vasistha — Nirvana Prakarana Purva (Liberation, Part 1), Sarga 19, Verses 31–34

दिगङ्गनाभिरभितो रम्याभिः पुरभूषणैः । एष निस्यन्दिभिः शीतैर्वीजितो घनचामरैः ॥ ३१ ॥ षोडशास्य सहस्राणि योजनानामधः क्षितौ । स्थिताः पादाः प्रपूज्यन्ते नागासुरमहोरगैः ॥ ३२ ॥ अशीतिश्च सहस्राणि देहोऽस्यार्केन्दुलोचनः । पूज्यते नाकसदने सुरगन्धर्वकिंनरैः ॥ ३३ ॥ चतुर्दशविधान्येनं गृहस्थमिव बान्धवाः । उपजीवन्ति भूतानि मिथो दृष्टपुरास्पदम् ॥ ३४ ॥