Yoga Vasistha — Nirvana Prakarana Purva (Liberation, Part 1), Sarga 98, Verses 15–23

यत्किंचित्परमाकाश ईषत्कचकचायते । चिदादर्शे न जातत्वान्न चित्तं नो जगत्क्रिया ॥ १५ ॥ अहं त्वं जगदित्येषा प्रतिपत्तिर्न वास्तवी । मिथ्या स्वप्न इवाभाति नूनं मेऽशेषकारिणी ॥ १६ ॥ वास्यस्य जगतोऽभावाद्यतो नास्त्येव वासना । अतस्तदात्मकं चित्तं कीदृशं क्व कुतः कथम् ॥ १७ ॥ अप्रबुद्धैरवगतं चित्तं दृश्यमिदं जगत् । असच्चित्तं निराकारं पूर्वमुत्पन्नमेव नो ॥ १८ ॥ नोत्पन्नं कारणाभावात्सर्गादावेव सर्वदा । लोकशास्त्रानुभवतो न च दृश्यस्य वस्तुनः ॥ १९ ॥ अनादित्वमजत्वं वा स्थैर्यं वाप्युपपद्यते । साकारस्यास्य जगतः स्थूलस्य प्रतिघाकृतेः ॥ २० ॥ समस्तकारणाभावाल्लोकशास्त्रानुभूतिभिः । युज्यन्ते च निराकर्तुं न महाप्रलयादयः ॥ २१ ॥ शास्त्रानुभववेदार्थसिद्धान्तैस्ते त्रयोऽपि वा । प्रलयाश्च न सन्तीति वक्त्युन्मत्तक एव च ॥ २२ ॥ लोकः शास्त्राणि वेदाश्च प्रमाणं यस्य नो मतेः । असद्भ्यो ह्यतिमूढः स सज्जनस्तं न संश्रयेत् ॥ २३ ॥