Yoga Vasistha — Nirvana Prakarana Uttara (Liberation, Part 2), Sarga 165, Verses 11–17

सन्त्येवासत्यभूतानि स्फारापि परमार्थतः । नास्त्येवाकारवत्तेयं स्वप्नोर्व्यामिव जाग्रति ॥ ११ ॥ नानात्मभासुरमपि स्वप्ने शून्यं यथा जगत् । तथैव जाग्रत्यखिलं व्योमैवेदं चिदात्मकम् ॥ १२ ॥ चिद्व्योम्नो हि स्वभावोऽयं यदिदं जगदम्बरे । कचतीत्थमिह स्फारमालोक इव तेजसः ॥ १३ ॥ चितेश्चमत्कृतिरियं जगन्नाम्नी चकास्त्यलम् । सहजा गगने कुड्ये परमाणौ स्थले जले ॥ १४ ॥ भ्रान्तावसत्यरूपायां स्थितायां सत्यवस्तुवत् । आकाशमात्रदेहायां क इवैनां प्रति ग्रहः ॥ १५ ॥ ग्रहीतृग्रहणग्राह्यरूपमाशून्यमेव च । सदस्त्वेवासदेवास्तु जगदत्राङ्ग किं ग्रहः ॥ १६ ॥ इत्थमस्त्विदमथान्यथास्तु वा मैव भूद्भवतु कोऽत्र संभ्रमः । कोऽत्र फल्गुनि फले फलग्रहो बुद्धमेव तदलं विकल्पनैः ॥ १७ ॥